බැලුම්


අහසේ හිරු සයුරුතෙර හොයන් යන ගමන හුන්නේ.. තව ස්වල්ප වෙලාවයි තිබුණේ හිරු සයුරේ ගිලෙන්න.. ඇසල සඳ මෝදු වෙමින් රාත්‍රිය උදවනු ඇත.

විහාරෙ පැත්තෙන් ඇහෙන බෙර හඬ හුන්නේ රාත්‍රියේ පැවැත්වෙන්න නියමිත පෙරහැරේ පූර්ව සුදානම් වීම් ගමටම ප්‍රසිද්ධ කරමින්.. ගමේ ළමෝ බයිසිකල් වලින් වගේම, පයිනුත් රංචු පිටින් විහාරේ දෙසට ඇදමින් තිබුණා.. සුදු හැඳි කාන්තාවන්, ළමෝ සහ සමහර පිරිමින් පන්සල වෙත ඇදෙමින් හුන්නේ මල් වට්ටි රැගෙන පෙරහැරේ යාමට පෙරුම් පුරමින්.

නමුත් සිරිමල්ගේ නිවසේ තත්වය ඊට හාත්පසින්ම වෙනස්.. සිරිමල්ට උන්නේ අම්ම විතරයි. තාත්තා මියැදී තිබුනේ සිරිමල් පුංචි කාලේදිමයි. ඒ රෑ දෙගොඩ හරියේ පැල රකින්න ගිය වෙලාවක අලි ගහලා. සිරිමල් හදන්න සිරිමල්ගේ අම්මා නොවිඳිනා දුක් විඳිනවා... උදේටයි දවල්ටයි ගල් කුරේ ගල් කඩන්න යන අම්මා රෑට ගෙවල් වල මෙහෙකාර කම් කරන්න යනවා.. සිරිමල් මේ දුක බලන් ඉන්න බැරිවයි අම්මට උදව් වෙන්න එක එක දේවල් කරන්නෙ.

සිරිමල් උන්නේ බැලුම් බෝල පුම්බමින්.. ඒ තම පැල්පත අයිනේ වූ බංකුවේ ඇණ තියා ගනිමින්.

ඒ බැලුම් එකින් එක ඉක්මනින් පිම්ඹෙමින් පැවතුනා.. එවිට රාත්‍රියෙ තියෙන පන්සලේ පෙරහැර බලන්න එන ළමයින් තමයි සිරිමල්ගේ පාරිභෝකයෝ වෙන්නේ... ඇත්තටම නීතිය එක්ක බැලුවොත් සිරිමල් ළමයෙක්.. ඒත් සිරිමල් වෙන ළමයින්ට විකුණන්න බැලුම් පුම්බනවා.. ඇතුලට සව් ඇට වගේ ප්ලාස්ටික් ඇට දාන ගමන් ලොකු ඇපල් ගෙඩියක් වගේ පුම්බන බැලුම් හිටපු ගමන් පිපිරෙනවා.. හරියට සිරිමල්ගේ ප්‍රාර්ථනා වගේ... හුඟක් ඒවා හැබෑවෙන් නැහැනේ.. සිරිමල් ඒක හිතන් නැහැ.. සිරිමල් බැලුම් පුම්බන ක්‍රමය හරි පිලිවෙලයි.. බැලුමට ඇට දානවා.. බැලුම පුම්බනවා ඒ එක්කම ගැට ගහලා ඇපල් ගෙඩිය වගේ වෙන්නත් ආයේ බැලුමේ පහලින් අල්ලලා ගැට එක්ක තව ගැටයක් දානවා. එක බැලුමක් රුපියල් එකසිය පනහකට විකුණ ගත්තම ලාභය හුඟක් ලොකුයි... අම්මට එයින් කොටසක් දුන්නම ලබන අවුරුද්දට ස්කෝලේ යන්න සපත්තු ජෝඩුවක් ගන්න පුළුවන්.. සිරිමල් එහෙම හිතුවා.. ඒත් ඉස්සර වගේ සිරිමල් බයිසිකල් ගන්න හීන මවන් නැහැ..
අම්මා කහට කෝප්පේ ගෙනත් පිල උඩින් තිබ්බේ සිරිමල්ට කහට එක බොන්න.. බැලුම් පුම්බන ගමන් සිරිමල් කහට උගුරින් උගුර බොනවා... මැස්සො දෙන්නේක් සිරිමල්ගේ කහට එකට ඔලුව දාන්න එනවා. සිරිමල් උන්ව බැලුම් පුම්බන ගමන්ම එලවන්න මහන්සි ගන්නවා...

"ආ සිරිමල්.. මොකෝ කරන්නේ... " පාරේ යමින් මල් බයිසිකලේ නවත්තගෙන අත වනලා සිරිමල්ට කතා කළේ සුනිමල්...

" මම එන්නම්.. ඔයාලා යන්න..."
සිරිමල් එහෙම සුනිමල්ට කියන ගමන් තව බැලුමක් අතට ගත්තා...  

සුනිමල් කියන්නේ සිරිමල්ගේ පන්තියේ යාලුවෙක්.. දහය පන්තියේ ඉඳන් එකොලහට යන්න තව මාස කිහිපයයි තියෙන්නේ. සිරිමල් අවුරුද්දේ හුඟක් දවසට මුදල් හොයාගන්න මේ වගේ ආදායම් මාර්ග වල නිරත වුණා... ගල් කපන්න ගියා. වත්තේ පොල් කඩන්න ගියා.. පුලුවන් හැමදේම සිරිමල් කරනවා. 

සුනිමල්ගේ මල් හරි ලස්සනයි... සව් කොළ වලින් හදලා තියෙන්නේ... මැද කහ පාටිනුයි, පෙති රතු පාටිනුයි ගැලපෙන්න හදලා තියෙන්නේ... ඒ මදිවට බීරලු එල්ලෙනවා වගේ තැනින් තැන ලස්සනට සව් කොළ වලින් හදපුව එල්ලෙනවා. සිරිමල්ට හිතෙන්න ගත්තා..

මටත් මල් බයිසිකලයක් පදින්න ඇත් නම්... සිරිමල් හිතුවා...
ඒත් එක්කම ඒ සිතුවිල්ල විසි කලා.. සිරිමල් සතුටු හිතෙන්න හීන බලන් නැහැ. පස්සෙ දුක හිතෙන නිසා... 

තමන් හරියට දහයේ සිංහල සාහිත්‍ය පොතේ පලවෙනි කතාව අපටත් දවසක ඉර පායයිද කතාවේ සිරියාවති වගේ නේද කියලා සිරිමල්ට හිතුනා..  මටත් කවදාහරි ඉර පායයිනෙව් සිරිමල් කල්පනා කලා.. ඒකට කොහොම හරි මහන්සි වෙනවා කියලා හිතාගෙන සිරිමල් බැලුම් අරන් පන්සල පැත්තට යන්න එලියට බැස්සා.


අද ලෝක රුධිර දායක දිනයයි.


ලෝක රුධිර පරිත්‍යාගකරන්නන්ගේ දිනය නැති නම් රුධිර දායක දිනය, ජූනි 14 ලෝක සෞඛ්‍ය සංවිධානය 2004 වසරේදී නම් කරන නිල ගෝලීය සෞඛ්‍ය වැඩසටහන් අටෙන් එකකි.

මෙම දිනය ආරක්ෂිත රුධිර හා රුධිර නිෂ්පාදනවල අවශ්‍යතාවය පිළිබඳව ප්‍රජාව දැනුවත් කිරීම සහ රුධිර පරිත්‍යාගශීලීන්ගේ ස්වේච්ඡා, ජීවිතාරක්ෂක රුධිර පරිත්‍යාගය සඳහා තුති පුද කිරීමක් සඳහාද ඉවහල් වේ. 

1930 වසරේදී ,   ABO රුධිර ඝන සොයා ගැනීම වෙනුවෙන් නොබෙල් ත්‍යාගය දිනු කාල්  ලෑන්ඩ්ස්ටයිනර් ගේ උපන්දිනය වන ජුනි 14 දිනය එතුමාට ගෞරවයක් වශයෙන් ලෝක රුධිර දායක දිනය ලෙස ලොව පුරා සෑම රටක්ම සමරනු ලබයි. 


රෝගියකු සඳහා පාරවිලයනය කිරීමට ආරක්ෂිත රුධිරය වන්නේ නිත්‍ය, ස්වේච්ඡාවෙන් නොගෙවූ රුධිර පරිත්‍යාගශීලීන්ගෙන් ලබා ගන්නා රුධිරය වේ.

ශ්‍රී ලංකා ජාතික රුධිර පාරවිලයන සේවාව 2013 වර්ෂයේ සිට 100%ක්ම ස්වකැමැත්තෙන්ම රුධිර පරිත්‍යාග කරන්නන්ගෙන් රුධිර සංචිත පෝෂණය වේ. එය ලෝක සෞඛ්‍ය සංවිධානයද තහවුරු කර තිබේ.. එය ශ්‍රී ලංකා සෞඛ්‍ය ක්ෂේත්‍රය ලබා ගත් විශිෂ්ට ජයග්‍රහනයකි. ලෝකය පුරා 100%ක් ස්වකැමැත්තෙන්ම රුධිර පරිත්‍යාග කරන්නන්ගෙන් පෝෂිත සෞඛ්‍ය ක්ෂේත්‍ර ඇත්තේ අල්ප ප්‍රමාණයකි. එහි ගෞරවය සියලුම රුධිර දායකයින්ට හිමි විය යුතුය.

රුධිරයට විකල්ප නැත. එසේම හදිසි අවශ්‍යතා සඳහා මෙන්ම සැලසුම් කර සිදු කෙරෙන ශල්‍යකර්ම සඳහාද රුධිරය හා රුධිර සංඝටකයන් අවශ්‍ය වේ.. තැලසීමියා, පිලිකා, වකුගඩු, රක්තහීනතා වැනි රෝග සඳහාද, හර්ද ශල්‍යකර්ම, දරු ප්‍රසූතියේ සිදුවන හදිසි තත්ව, හදිසි අනතුරු සඳහාද රුධිරය හා රුධිර සංඝටකයන් අත්‍යාවශ්‍ය වේ.. 

COVID-19 හදිසි වසංගත තත්වයේදී වුව අවශ්‍ය රුධිර සැපයුම් පවත්වා ගැනීමට රුධිර දායකයින් සිය නිහඬ සේවය ලබාදී අවසන්‍ ය.. සිය ජීවිතයේ කුඩා රුධිර ප්‍රමාණ පරිත්‍යාග කරමින් මිය යමින් පැවතුන දස දහස් ගණන් ජීවිත වලට නැවත පණ ලබා දෙමින් ඉදිරියටත් ඒ කර්තව්‍යය නොපිරි හෙලා ඉටු කරන ජාතික වස්තූ හුස්ම ගනිමින් ඔබ හා මා අතර සිටිති.. 

ඒ ගෞරවනීය රුධිරදායකයන්ට අපගේ උත්තමාචාරය!!! ඔබ නොමැති නම් කිසි දිනෙක ශ්‍රී ලාංකික සෞඛ්‍ය ක්ෂේත්‍රයේ මෙතරම් දියුණුවක් අත කර ගත නොහැකි වනු ඇත...

අත්හැරීම


සියලුම ක්ෂුද්‍ර කාරණා මෙන්ම විසල් කාරණා ඇඟිලි තුඩු වලින් එකතු කරමින් හුන්නෙමි. මහා සක්වල ධාතුව කම්පා කරන්නා වූ ක්ෂුද්‍ර කාරණාද, මහා ධරණිතලයේ කුඩා භූමිකම්පා ඇති කරන්නට සමර්ථ වන්නාවූ විසල් කාරණාද වෙන් වෙන්ව මා එක ගොඩකට ගසමින් හුන්නෙමි.. ඒ යටින් රතු පාට තීන්ත වලින් විශේෂ කාරණා පමණක්ම ඉස්මතු කලෙමි.. එය භූ ගර්භය කම්පා කරගෙන මධ්‍ය ලක්ෂයේ සිට කුණාටු මාරුතයක්ව සුන්නත්දූලි කරගෙන පැමිණෙන ආදරය පමණක්ම අතැර තිබුණ බව කිව යුතුය..

ලොව පුරාම මහ ජන සංහාරයක් ඇති කල වසංගතය අවසානයක් නුදුටුවද මගේ හිතේ වූ ආවේණික වසංගත තත්වය මඟහැර ඒ ජන සංහාරයට මගේ නමත් එකතු කරන්නට අවැසි වූවද එය මගෙන් මඟ හැරී තිබුනි. නුමුත් මෙහි කෙලවර දක්නා ලදුව සිය දිවි නසා ගැනීම නම්, එය වූ කලී හුදෙක් නොනැවතීමක් බව මම විශ්වාස කරන්නෙමි. එය මා විසින් අත්හල කරුණකි. නමුත් මෙහි අවසානයක් අවැසිය.. අහවරක් නොවේ නම් යලි යලිත් නැගෙමින් බිඳෙමින් නිර්මිත සාගර රල මෙන් හැඟීම් හා බැඳීම් වලින් ආතුරව මා වර්ෂ කිහිපයක් නොව දශක කිහිපයක් ගෙවිය යුතුමය. එකී නොනැවතීම අවසානයේ මගේ සන්තානගත ප්‍රේමයේ නාමයෙන් සන්තානය ආතුර වන බව නම් නිසැකය.  නුමුත් යලිත් වතාවක් බලාපොරොත්තු අත්හල මා, තවත් වතාවක් එයට අනුබල නොදෙමියැයි සපත කරමින් හුන්නේමි. සියලු බලාපොරොත්තු වලාකුලු වියැකෙමින් තිබිනි... මම විසින්ම ඒවා එකින් එකගෙන ස්ත්‍රික්කයකින් මැද චොප්පා කරලන්නෙමි. ලෝබොර තලන්නා සේ කුළු ගෙඩියකින් සිතුම් ප්‍රවාහය තලන්නෙමි.


අනාරාධිතව පැමිණි ආදරය අනාරාධිතවම අවක්ෂේප වීම කෙතරම් වේදනාකාරි රිදුමක්දැයි කිව යුතු නොවේ.. අන්‍යන්ට අනර්ථයක් වන මගේ අවශේෂ කතාව ඔහුගේ මව විසින් අතැර දමන ලද්දකි. මේ සිතුවම් පටය ඇරඹි ප්‍රථම භාගයේ ඇය මා හා කිසිඳු වෛරයක් නොදැක්කාය. මාගේ වරදක් හෝ නොගැලපීමක් නුදුටුවාය. මෙය අවසාන භාගයදැයි නොදනිමි. නමුත් දැන් මා හා විසීම වූ කලී ඇයගේ මිය යාමයැයි සපත කරගෙන ඔහුව භාවිතා කරන්නාය.


නමුත් එය මා තවම එල්බ සිටින වණයකි. ඔහු තවමත් ළදරුවකුව සන්තුෂ්ටිය සොයමින් යෙදෙන ගමනකි. මෙය වහාම අවසන් කල යුතුම පරිද්දෙන් සිදුවිය යුතුව තිබිනි. 


කුඩා හුස්මක නොරැදෙන ආදරය ගැඹුරු හුස්මක තිබේ යැයි කිව හැකිද... එය එසේය. පුදුමය නම් සෑම නොගැඹුරු හුස්මක් අනිච්ඡානුග බැවින් ආදරය නොරැඳෙන්නේමය. නමුදු සියලු ගැඹුරු හුස්ම අනිච්ඡානුග වුව ඉච්ඡානුග වුව ආදරය හෝ එහි සංක්ෂිප්තය නොවරදවාම රැඳෙනු ඇත...

ආදරය වේගයෙන් හමන සුළඟක් නම් මා එහි වේගයට හසු වූ වරා මලක් වැනිය.. නුඹ මා චණ්ඩව මාරුතයේ ගසාගෙන ගොස් කළඹා අතරමං කර ඇත..


"මේ මල ඔබට...!"

සිනාවක් නොරැඳුනද නුඹ මලකින් හෝ ප්‍රේමය රැගෙන ආ බව කිව යුතුය... නුමුත් මල් පෙති ඉස ගොඩ නැඟු මාවත එපරිද්දෙන් නොනැඟි ඇති බව නම් සැබවි.. 

කඳුකරය සිසාර පවතින්නේ දැනුදු අපේ මතකයන්‍ ය.. ඒවා ගොඩැලි එක් කර සමතලා කර ආදාහනයට කැමැත්තෙමි.
මේ මුහුදු බඩ දාහයට මා අකමැත්තෙන් හෝ කැමති වනු ඇත. නොඑසේ නම් වන්නේ කඳුකර මාරුතයේ මතකයන්ට හසුවන්නටය.

ඔබට කිව යුතු කාරණය නම් මෙයය.

මා ඔබව අත්හැරයා නොව, මා ඔබ නමින් හුස්ම ගන්නා මතක ප්‍රවාහයට හසු වූ සියලුම ක්ෂුද්‍ර වස්තූන් හා ස්ථාන හැර පියා නව ලැගුම් හලක් සොයන්නෙමි. ඔබ ඔතැනම සිටින්න. නොපැමිණෙන්න.. 



කුරුලු දඩයම 02

  කුරුලු දඩයම 01 දවසක් උදෑසනක දුර්ශාන් සොයා ආවේ දුර්ශාන්ගේ හොඳම මිතුරෙක් වන සංධීර්. ඔහුට පුදුමයි මේ දුර්ශාන්ගේ වෙනස.  "ක්‍රිශෝලියි ඒකිග...